Прысуд гвалтаўніку беларускі Лізы і смерць Дэвіда Лінча — Кубачак кавы

Узгадваем падзеі тыдня праз важныя матэрыялы Еўрарадыё.

Добрага пятнічнага вечара! З вамі Тарас Тарналіцкі з Еўрарадыё і кароткі агляд важных тэм, на якія наша рэдакцыя звярнула ўвагу цягам мінулага тыдня.

А за апошнія сем дзён шмат што адбылося. Мы выпусцілі падкаст з вайсковым добраахвотнікам “Джынам”, які падзяліўся сваёй перапіскай з маці. Паразмаўлялі з беларусам Андрэем, які назіраў як згарае частка Лос-Анджелеса. Пабывалі на агучванні прысуду Дорыана С. — гвалтаўніка, забіўшага беларуску Лізу ў мінулым годзе. І парыліся ў фільмаграфіі майстра кінасюрэалізма Дэвіда Лінча, які літаральна на днях памёр ад эмфізэмы лёгкіх.

Нас чакае невялікая і натхняльная вандроўка. Хватай кубачак кавы — і пачнем яе.

Размова добраахвотніка з бацькамі

Аб чым думаюць жаўнеры, ваюючы на ўкраінскім фронце?

Акрамя пастаўленых камандаваннем мэтаў і жадання выжыць — яны думкамі пра блізкіх людзей.

Іх гісторыю ліставання пераказвае серыя падкастаў Еўрарадыё "Як ты?". У ім распавядаецца пра тое, пра што ваяры маўчаць, калі на пытанне "Як ты?" проста адказваюць: "Я ў парадку".

Першы выпуск прысвечаны Міколе з пазыўным “Джын”. Хлопец ваюе сярод беларускіх добраахвотнікаў і абараняў горад Курахава на Данеччыне, які нядаўна занялі расійскія войскі.

Галівуд у полымі

Багатыя таксама плачуць — асабліва калі іх маёмасць знішчае некантралюемая стыхія.

Больш за тыдзень Заходняе ўзбярэжжа ЗША, дзе знаходзіцца горад амерыканскай кінаіндустрыі Лас-Анджэлес, пакутуе ад пажараў. За гэты час сотні тысяч чалавек былі эвакуяваныя, дзясяткі тысяч будынкаў згарэлі, а дзясяткі чалавек загінулі.

Еўрарадыё паразмаўляла з беларусам Андрэем, які ўжо больш за два гады жыве недалёка ад Галівуда. Ён распавёў, як горад мрояў перажывае катастрофу.

Пакаранне забойцу Лізы

Памятаеце амаль год таму ў Варшаве разыгралася трагедыя з беларускай эмігранткай Лізай, якую згвалціў і фактычна забіў мясцовы жыхар Дорыан С.?

Дык вось гэта жудасная гісторыя дайшла да справядлівага фіналу — суд прысудзіў гвалтаўніку пажыццёвае зняволенне і 200 тысяч злотых кампенсацыі на карысць брата і бойфрэнда дзяўчыны.

Журналістка Еўрарадыё Янка Рэн была на прысудзе і запісала словы суддзі Паўла Добаша, якія вартыя ўвагі:

— <...> Пакаранне, якое суд прызначыў вінаватаму за такое жорсткае злачынства, можа быць сустрэтае пэўнымі словамі абурэння і можа падацца парадаксальным, але гэта дэманстрацыя слабасці грамадства і дзяржавы, бо гэта пакаранне ніколі не верне яе да жыцця.

Шэдэўры фільмаграфіі Дэвіда Лінча

Памёр Дэвід Лінч — мастак з міравым імем і проста сумленны чалавек надзвычайна шырокіх талентаў.

За свае 78 год свайго жыцця ён паспеў сцвердзіцца ва ўсім, чым бы ні занімаўся: маляванні карцін, фатаграфіі, здымках кліпаў, пісьменніцтве, трансцэндэнтнай медытацыі, напісанні музыкі.

Я прапанаваў чытачам Еўрарадыё свой суб’ектыўны погляд на лепшыя працы майстра мастацкага абсурду і жыццёвага сюррэалізму, сярод якіх вы знойдзеце як знакамітыя праекты (“Твін Пікс”, “Малхоланд драйв”), так і забытыя працы рэжысёра (“Галава-гумка”, “Унутраная імперыя”, “Сіні аксаміт”).

***

На гэтым усё. Дапівайце каву і ўрывайцеся ў студзеньскія выходныя! Сустрэнемся з вамі ўжо ў наступную пятніцу.